- 013 -
1471 (18. stycznia) [Wrocław].
Wrocławska Rada mianowała czterech swoich członków na stanowiska panów monetarnych i przyjęła zarazem od nich ślubowanie, że nie będą działali oni ze szkodą dla miejskich wydatków.
— Wir ratmanne etc. bekennen etc. das wir mit unsern eldisten scheppin dem kouffman und allen geswornen hantwerckmeistern der ganczen gemeyne gewegin haben die grosz ere auch nucz und fromen, die unsir allirgnegister herre kunig mit der moncz uns allen und eyme gemeinen gut zu stewer gnediglichen gegeben und befolhen hat, dobey wir undir andern sachen dorczu notturftig betracht haben, das wir dieselbe moncz ordentlich und uffrichtiglich zu volfurn seinen kuniglichen gnaden zu eren, alle disen landen und uns allen zu gut, befolhen haben den ersamen Caspar Kober, Hansz Crapff, Peter Crebil und Bartholomeo Schewerlin, die dobey als obirste monczherren iren besten fleis tun sullen, so als wir alle alleczeit dorumme nicht zusampne komen mögen; wasz sie adir alleine nicht getrawen awszurichten, do mögen sie denne ferrer rate zu uns suchen. Sunder so grosser anlag zcu der moncz gehöret, den die stat alleyne nicht vermag, und auch der kowffman sein silber gelt gut und habe in die gemeyne uff die stat nicht borgen noch awsgeben will, dorumme die obgnanten vir monczherren, so sie sich kegin dem kouffman ungesundert und mit gesampter hant vor sich und ire erben als eigene geltschult wurden vorschreiben und globen, möchten sie villeichte silber golt und ander anlag hirynne notturftig bekommen. So denn die sache uns alle und die gancze stat anlanget, wer unbillich, das sie alleine hirynne notleiden, ebinthewer stehen ader schaden nehmen sulden, so als [sie] uns allen und eynem gemeynen gut zcu fromen diese burde uff sich durch unsir fleissige bete genomen haben, und dorumme so ist billich, das wir alle und iczlicher besunder mit gesampter hant und ungesundert in und iren erben widerumme globen. Und dorumme wir obgnanten ratmanne scheppin kouffman und alle gesworne eldisten hantwerkmeister mit allen die zu uns gehören jungsten und eldisten der ganczen gemeyne dieser stat Breslow, die wir iczunder sein und zcukunfftig sein werden, globen in crafft disz briffs eyntrechtiglich ungesundert und mit gesampter hant vor uns und unsir erben und nochkomen, das wir und die gancze stat die obgenanten vir monczherren und ire erben sulchis globdes, was sie sich umb silber, golt ader anderley war, nichtis usgenomen, zcugut diser moncze und uns allen zcu fromen vorschreiben, globen und awsborgen werden, auch allis schadens, den sie dobey und sust in der moncze, do got vor sey, nehmen und empfohen mochten, in welchirley weyse das gescheen möchte, allenthalben freie eredigen und ganz schadlos halden ellen und sullen ne arg nd ane alliley widderrde, wie man die erdencken möchte. Und des zcu geczeugniss etc. Actum et datum feria sexta in die beate Prisce virginis anno etc. lxx primo.